|
 30 mart 2009-cu il tarixdə Zaqatala rayonunda “31 mart- Azərbaycanlıların soyqırımı günü”nə həsr olunmuş tədbirlər keçirilmişdir.
Ilk öncə Zaqatala şəhərində yeni inşa olunmuş “Azərbaycanlıların soyqırımı” xatirə kompleksinin açılışı olmuşdur. Kompleksin açılışını bildirən rəmzi lent kəsilmiş, tədbir iştirakçıları abidənin önünə əklil və tər çiçəklər düzmüş, soyqırım qurbanlarının xatirəsini ehtiramla yad etmişlər. Daha sonra rayonun “Qala düzü” istirahət mərkəzində elmi-praktik konfrans keçirilmişdir. Konfransda Zaqatala rayon icra hakimiyyətinin başçısı Asif Əsgərov çıxış edərək azərbaycanlılara qarşı aparılan soyqırım siyasətinin xranologiyasını ətraflı təhlil etmiş, etnogenezi və ilkin məskunlaşma arealı dəqiq bilinməyən, hər yerə səpələnən, yalnız bəd əməllər hesabına bir yerə cəmləşən ermənilərin “Böyük Ermənistan” yaratmaq iddiasını xüsusi qeyd etmişdir. Daha sonra natiq ulu öndər Heydər Əliyevin Azərbaycan tarixində ilk dəfə olaraq 26 mart 1998-ci ildə “Azərbaycanlıların soyqırımı haqqında” fərman imzalamaqla xalqımıza qarşı törədilən bu cinayətin obyektiv mənzərəsini təsvir etmək, ona siyasi və hüquqi qiymət vermək imkanı yaratdığını bildirmiş, ümummilli liderimiz Heydər Əliyevin qətiyyətli və məqsədyönlü siyasətini hal-hazırda Azərbaycan Respublikası Prezidenti cənab İlham Əliyev tərəfindən prinsipiallıqla davam etdirdiyini vurğulamışdır. Məruzənin sonunda rayon rəhbəri insanlarımızın vətənpərvərliyi və mütəşəkkilliyi, Azərbaycan dövlətinin məqsədyönlü fəaliyyəti, siyasi iradəsi sayəsində qarşımızda duran bütün problemlərin həllinə, o cümlədən ərazi bütövlüyü və suverenliyimizin bərpasına, xalqımıza qarşı əsl soyqırımı siyasəti həyata keçirənlərin, başqa xalqlara düşmənçilik və nifrət ideologiyasının daşıyıcılarının ifşa edilməsinə nail olacağımıza əminliyini bildirmiş, aydın sabahlara büdrəmədən getmək üçün dünənimizi yaxşı bilməli, tariximizi dərindən öyrənməli olduğumuzu, dost və düşmənimizi tanımağın vacibliyini xüsusi qeyd etmişdir. Tədbirdə azərbaycanlıların soyqırımına həsr olunmuş film nümayiş etdirilmişdir.
 |
