Fanat: Avqustun 4-də Qax rayon İcra hakimiyyətində Türkiyənin Kayseri şəhərində məktəblilər arasında yenicə başa çatmış şahmat üzrə 6-cı dünya çempionatının qalibi, doqquz yaşlı Qax məktəblisi Xanım Balacayeva ilə rayon ictimaiyyətinin görüşü olub.
Tədbiri giriş sözü ilə açan rayon İcra hakimiyyətinin başçısı Musa Şəkiliyev bildirib ki, bu gün hər birimizin ürəyi böyük iftixar hissi ilə döyünür: "Bu da təsadüfi deyildir. Rayonumuzun təmsilçisi Xanım Balacayeva Qax rayonunun şahmat ənənələrini uğurla davam etdirərək doqquz yaşlı məktəblilər arasında dünya çempionu adına layiq görülüb. Çox fərəhlidir ki, X.Balacayeva bu yüksək ada layiq görülmüş üçüncü şahmatçımızdır. Bundan əvvəl beynəlxalq qrossmeyster Aynur Sofiyeva və FİDE ustası Pərvanə İsmayılova da bu şərəfli ada layiq görülüb."
Tədbirdə rayon gənclər və idman idarəsinin rəisi Əlövsət Bayramov çıxış edərək rayon idmançılarının respublika və beynəlxalq miqyaslı yarışlarda qazandıqları uğurlar barədə danışıb. Bildirib ki, yeni dünya çempionu Xanım Balacayeva şahmatla 5 yaşından məşğul olmağa başlayıb. 2008-ci ildə səkkiz yaşlı qızlar arasında Azərbaycan çempionatında 2-ci, elə həmin il Gürcüstanın Batumi şəhərində keçirilmiş Avropa çempionatında 5-ci, 2009-cu ildə səkkiz yaşlı qızlar arasında Azərbaycan çempionatında 1-ci yeri tutub. Balaca şahmatçı 2009-cu ildə Batumidə keçirilmiş Avropa çempionatında 4-cü, 2010-cu ildə isə 10 yaşadək qızlar arasında Azərbaycan çempionatında 1-ci yerə çıxıb.

Fanat: "Simurq" 2010/2011 mövsümü üçün iştirak ərizəsini Peşəkar Futbol Liqasına təqdim edib. Fanat.az xəbər verir ki, Zaqatala klubu siyahıya 23 futbolçunun adını daxil edib.
Qyoko Hacievski yeni mövsümdə 3 qapıçının, 8 müdafiəçinin, 7 yarımmüdafiəçinin və 5 hücumçunun xidmətindən yararlanacaq.
21 yerli futbolçu ilə mövsümə başlayacaq "Simurq" iştirak ərizəsinə cəmi iki cəbəninin adını daxil edib. Bu da komandanın cəmi 8,5 faizi deməkdir.